ثنائيات - الجزء الثانى

ثنائيات - الجزء الثانى

 

 أنا الجارح

أنا الجارح وأنا المجروح          أنا وجعي يهِد الرُوح 


ملازمني لو فين أروح              عذابي صعب بيه أبوح


هُمومي ردمت بحور مطروح        دموعي ملِت جبال وسُفُوح


آهاتي صدى لصُوت منبوح           وبسيف الذكريات مدبوح


ومِن قلبي ريحة الوَجَع بتفوح           والندم هد الآمال والطُموح


وباب اليأس قُدّامي مفتوح            ومِتزيّن بأوجاع وجُروح


ومستنيني أنا الجارح                 أنا الجارح وأنا المجروح


يابحر

يابحر هدِّي الموج                  وارفع راسك لفوق

واوعاك فيوم تغضب               وخليك دايمًا خَلُوق

عارف انّك شفت ياما              وعارف انّك مخنوق

بس انا برده ابنك                   وابن اللي بيحبوك

وعارف إنّك بتكره                 الواطي والصعلوك

وحاسس بغضبك                   على اللي خانوك

لكن يابحر اهدى                    وارفع راسك لفوق

وانسى كل اللي خانك              وعِد اللّي بيحبوك

واحفظ دايمًا مكانك                 بين اللي بيعزّوك

ده الكره دايمًا نهايته                العبد والمملوك