سكيزوفرينيا - حِصة الدين المنسيّة

حصة الدين

 

بعد أطنان من الأسئلة الوجودية .. استوقفتني أطنان اخري حول ماهية الدين كعلم شرعي و ليس ايمان روحاني .. علي أي عقيدة أنا ؟ ما معني كوني سُنّي ؟ و هل يوجد ما هو " غير السُنّة " ؟ و كيف انقسم الناس من بعد ذلك الي سنة و غير سنة ؟ و ما هو تاريخ العقائد و المناهج في مصر حتي أصبحت انا أُنسب للسنة و هل أنا من أهل السنة و الجماعة أم انا من الأشاعرة ؟ و من هم الأشاعرة ؟ و ما علاقة الأشاعرة بالأزهر ؟ وان كان الأزهر هو المؤسسة الاسلامية الكبري في العالم أجمع اذا ما هي عقيدة أهل الأزهر و ما هو منهجهم ؟ ما معني كلمة عقيدة ؟ و ما معني منهج ؟

أول طريق للاجابة هو ان استعيد اللغة العامية لأن الموضوع مش ناقص تعقيد .. بساطة الأديان دايما في روحانياتها و الحاجات الغير محسوبة و لا متشافة فيها .. بس الدين كعلم شرعي له تاريخ يعتبر معقد .. في الخانة الضيقة ممكن تكتفي بكونك سُني يعني من أتباع السنة النبوية و من تناقلها من صحابة و من حفظها من صحابة الصحابة .. و تكتفي بآراء فقهية لللأئمة الأربعة – هو صحيح ليه هما الأئمة الأربعة و ليه مش خمسة مثلا و يفرقوا ايه عن اي رجل دين تاني ؟ - أو تكتفي بأركان الدين من شهادة و صلاة و ذكاة و صوم و حج للبيت بس معندكش اي معلومات تانية غير كده و علاقتك بالدين توقفت عن " عبادات " بدون فهم .. 

حاليا لا بطلب منك ولا بطلب من نفسي تحيز .. ولو انت متحيز تحيز وجودي لمجرد انك اتولدت و اتربيت علي نهج معين فبنصحك متكملش قراية .. خلينا متفقين ان في حاجات معينة مفيهاش فهم .. و ملهاش تفسير غير ان ايمانك و يقينك في الله بيحركك ناحيتها .. بس السواد الأعظم باقي المعرفة الدينية اللي انت اتربيت عليها هو جزء مظلم جدا بالنسبالك .. معرفش انت بتنساه او بتتناساه بس الحقيقة بتقول ان الدين بالذات مينفعش يبقي سد خانة .. 

الموضوع بسيط .. الفرق بينك و بين الملحد هو مجموعة من الاسئلة و الاجوبة ... هو سئل نفسه و و بطريقة او بأخري الحد لأنه ظن انه ملقاش اجابة .. انت مسألتش نفسك اصلا فطبيعي ان انت كمان يبقي معندكش اجوبة .. مش ملاحظ حاجة ؟ ان انتو الاتنين معندكوشش اجابة .. طيب فايدتها ايه التقيد لقوانين دينية معينة انت مش علي فهم بفلسفة تطبيقها او تفاصيلها؟ لو انا مش علي فهم تام بأركانه و حدوده و اوامره و نواهيه و تاريخه ؟ هتقوللي حتي تاريخه ؟ هقولك اه .. الدين نفسه تاريخ بشكل او بآخر .. السيرة و السنة و الفقه المقارن تاريخ عايشين عليه حتي يومنا هذا .. يبقي تاريخ دولة الخلافة ثم الأموية و العباسية و الفاطمية و الأيوبية و المملوكية و العثمانية و غيرهم مهم ..

 
الكلام ده بيفكرني بحصة الدين بتاعة المدرسة اللي كنا "بنزوّغ " منها عشان مملة و المدرس بيضربنا عشان مش حافظين و هيا حصة الدين كانت ايه غير " سمّع " ؟ احنا علاقتنا بالدين كانت مبنية علي " لما تكبر هتعرف " و اديني حاليا كبرت و معرفتش .. تقدر تقوللي ايه الحل دلوقتي ؟ 

لما حد يسألك يقولك بتعرف تجمع و تطرح ؟ تقوله ايوة .. 1 + 1 بكام ؟ لو قلت ب 2 يبقي بتعرف و لو قلت بـ 3 او قلت معرفش يبقي انت مبتعرفش تجمع و تطرح و بكده مينفعش تقول انك بتعرف تجمع و تطرح من النهاردة غير لما تتعلم او تقول اني مبعرفش ..

نفس الشئ لو حضرتك مسلم و اتسألت ليه الكعبة بيت ربنا ؟ و ايه الفكرة من الصيام ؟ و ليه المسلم ممكن يتجوز 4 مش واحدة بس ؟ لو مش عارف اجابة الاسئلة دي يبقي ايه العائد " من لقب مسلم " ؟ زيك زي اللي قال بيعرف يجمع و يطرح و طلع مش بيعرف ..

انا متقبل اعذارك انك متعودتش او متعلمتش انك تسأل و اوقات اتمنعت انك تسأل ..

و انا حاليا بدأت انوّر حاجات في دماغك ممكن تخليك تسأل عشان تعرف .. ولو عرفت هتفهم .. و لو فهمت هتطبق الفهم ده و لو طبّقت هتبقي بتخدم رسالة وجودك ..

اللي جاي هسأل فيه أكتر يمكن هعرف حاجات و يمكن مش هعرف حاجات  تانية .. يمكن اجاوبك و يمكن لا .. يمكن اوصل و يمكن اتوه .. متعتمدتش عليا و لا علي غيري .. حصة الدين فاتتنا احنا الاتنين و مش هينفع احضرها انا او غيري مكانك .. اومال هتعمل ايه في الامتحان ؟   

معلومات عن الكاتب
Student - Former Account Manager - Former Public Relations Adviser - Creative Writer - Blogger - Co founder at TEDxSmouha
.. عُمر الأسكندراني .. بدرس هندسة في جامعة الاسكندرية .. 23 سنة .. مُحب للتاريخ و علوم النفس و الاجتماع .. مُحب للرياضة و غير مُحب للرياضيات .. عَلماني ليبرالي يساري يميني اسلامي مُتشدد ..و من الناس اللي بتحب تفكر في الدين و بتتفكر في تطبيقه بيحب سورية و أهل سورية و أي حاجة من ريحة سورية متناقض جدا .. هادئ جدا .. عملي جدا جدا جدا