جريمة حلم

انت فقد قادر على تحقيق حلمك فلا تدع تحديد مصيرك بيدالاخرين

 

بنعيش فى مجتمع بيطلق على من يسعى وراء حلمه و يحاول إثبات نفسه مجرم و جريمته حلمه .. بنشوف ناس حققوا أحلامهم بعد تعب و مرمطة سنين مش ايام و مستمرين فى الطريق اللى رسموه بنفسهم، أفتكر أول مناقشه ما بينى و بين والدى عن حلمى " كاتبه " افتكر اتقالى ايه بالحرف عن قد ايه انا فاشله و مش نافعه و انى تافهه .. بس والدى مهتمش بجمله انا قلتها

عايزه أخلى قلمى يتكلم و يصارح و يناقش .. قلمى يقدر يغير العالم

لقيت كمية النقد اللى اتعرضت ليها مش طبيعيه فى حين ان لو المناقشه كانت سليمه ع الأقل كان فى طرف هيتقبل رأى التانى .. افتكر ان ساعتها الغضب سيطر على عقلى و ان تفكيرى بقى مشلول .. مكنش عندى احتمالية انى ممكن ملقيش الدعم من أكتر حد كنت واثقه انه هيدعمنى لقيت هجوم على حلمى .. ساعتها بس فكرت فى سؤال واحد "ليه الأهالى بيحددوا مصير عيالهم ؟" استمريت فى دخول مناقشات بس لقيت ان اجابتهم مكنتش مقنعه ليا بالمره ان أهلى أدرى بمصلحتى، شوف فلان و علان بقى ايه، احنا نفسنا نشوفك كدا.

مبدأيا انتو مش ادرى بمصلحتى اطلاقا انتم عندكم اعتقادات و مفاهيم مختلفه عننا .. انتم جيل و احنا جيل .. ليه ابقى زى فلان و علان انا عايزه ابقى مختلفه .. عايزه اختار مجال اتميز فيه .. نفسكم تشوفينى كذا دى حاجه والله كويسه ليكم مش ليا هتريحكم و تتعبنى هكون فاشله قدام نفسي .. و ناجحه فى نظركم.

تبدأ مرحلة التفكير المستمر ما بين إنك توفق ما بين حلمك و حلم أهلك .. حلمك اللى بيتماشي مع ميولك و رغباتك و هوايتك و حلم أهلك اللى ممكن يكون بعيد عن حلمك بمراحل و انك مجبر تحقق حلم اهلك، بس  وصلت لحاجه كويسه انك تمشي فى طريقك لهدفك اللى هو حلمك وتحقق انجازات و انت ماشي فى الطريق دا .. خلى حلم اهلك يكون انحاز من الانجازات اللى هتحققها .. هتتعب حاليا بس هتستريح بعدين..

أوعى تتنازل عن حلمك .. حلمك رزق ربنا بعتهولك .. بنشوف و بنسمع و يمكن بنعيش مسلسل أليم بيتلخص ان انسان اتنازل عن حلمه بمجرد ما يقع من طوبه حتى لو كانت الطوبه دى اهلك .. معذرة فى التشبيه لكن اهلك مش هيدعموك غير فى الطريق اللى هما اختاروه و اللى انت مجبر تمشي فيه.

لأن قليل من الأهالى اللى بيسيبوا الحريه لولادهم فى اختيار مستقبلهم .. الفكره انك لو مشيت فى طريق غلط ارجع و جدد أملك و اختار طريق تانى و فى الحاله دى هتكتسب مهارة حسن الإختيار أما لو لقيته صعب كمل و استمر و أقلم نفسك عليه و هنا هتكسب مهارة المرونه .. و خليك عارف ان كل ما هتتمرمط أكتر كل ما هتكتشف فى نفسك مهارات و امكانيات عندك لازم تستغلها .. 

فرصك اللى بتجيلك بعدد أنفاسك لو أنت دورت عليها مع ايمانك بقدرتك و يقينك و نيتك الصادقه .. 

ملحوظه :- الموضوع دا خاص بيا أنا .. لأنى يمكن من القليلين اللى أهاليهم بيتحكموا فى مصيرهم 

 

مصادر الصور : Wikimedia