"سكيزوفرينيا - في بيتنا "إرهابي

الخوف شيء صحِّي .. انساني .. فِطري .. مش عيب و مش حاجة تِكسِف، الخوف هو الحاجة اللّي مخلياك لسه عايش لغاية دلوقتي و بتقرا الكلام ده .. تخاف على نفسك أو علي غيرك، تخاف من الّي خلقك، تخاف من حاجات كتيرة لأن مفيش حد مش بيخاف .. الموضوع نسبي .. وملوش علاقة بالجُبن.

بس لغاية هنا أقدر أقول إن ده الجزء الطبيعي .. اللّي مش طبيعي هو الخوف الناتج عن الإرهاب .. مش الإرهاب ايّاه .. أقصد الإرهاب النفسي و المعنوي .. الإرهاب اللّي الناس بتفكّرُه تشجيع و ودراية بالمصلحة .. الإرهاب اللّي أنتج شخصيات تابعة و إمّعات و غير سوية .. الإرهاب اللّي بيجبر حد إنه يمشي في طريق مش حابب يمشيه و يختار حاجات مش هو اللي بيحبها .. و يبقي شخصية في قالب معين ميعرفش يخرج منها .. هو ده الإرهاب.

 الارهاب ده بينتِج شخص إرهابي .. بيرهّب أسرة بالكامل .. بيظلم كل أفرادها .. ساديّة و كِبر و جُمود و مرض نفسي بيتنقل ما بينّا و احنا مش حاسّيين .. الإرهابي ده بيسيطر علي عقول و بيقهرها أو بيغسلها .. بيديرها من ورا الكواليس زي عروسة في الإيد .. و انت عارف إرهابي ليه ؟ لأنّه بيدمّر حياته و حياة بيته .. بيدمّر حاجات فيها معنى للحياة و الإنسانية .. ميقلّش عن اللي بينهي حياته و حياة غيره بحزام ناسف ..

 الحزام ده ملفوف في دماغه مش علي وسطه .. الحزام ده فيه مخزون "عفِّن" من التراكمات و الزوائد المجتمعية .. فيه التقاليد و العادات المتخلّفة و الضّارة .. فيه تشكيلة من الأمراض النفسية المُعدية اللّي بتروح للناس على شكل أفكار و تخلّيهم إرهابيين و خطر على المجتمع ..

 الإرهاب مش بس إرهاب ناتج عن تعاليم دينية مغلوطة أو تشوُّهات نفسية .. الإرهاب مش لازم يكون قتل مادي و دم في كل حتة .. الإرهاب ممكن يكون إرهاب فِكْر و تطرُّف بشكل عام .. جُمود و عصبية و حاكمية و تحكُّم في خلق الله .. ده إرهاب خطير لمّا يكون مُتخفّي و مش مُعترَف بيه بين الناس ولا المجتمع و للأسف ممكن يكون ورا فساد مجتمعي كبير واحنا مش عارفين ولا عايزين نعرف.

 أي شخص بيخوّف الناس يبقي إرهابي .. أي شخص بيموت الناس بالقتل أو بيموتهم بالبطيء معنويًا يبقي إرهابي .. بيسيطر و يتحكم في حياة الناس كأنّه مالك لمصيرهم يبقي إرهابي ..

في بيت كل واحد فينا شخص إرهابي بنسبةٍ ما .. متبلغوش عنه الشرطة .. قوّموه .. ثوروا عليه .. وقّفوه قُدّام المراية و قولوله إنّه بني ادم من لحم و دم مش ملاك من السما .. إرهابي و بيغلط في حقّنا كلّنا و احنا مش بنحبك عشان احنا المفروض نحبك .. احنا بنحبك عشان خايفين منّك .. الحُبّ الناتج عن خوف بيروح بمجرد ما مصدر الخوف يروح ..

 

الإرهابي ممكن يكون أب أو أم .. زوج أو أخ .. مسؤول سياسي أو قيمة دينية .. عشان كده .. في بيتنا " إرهابي "

معلومات عن الكاتب
Student - Former Account Manager - Former Public Relations Adviser - Creative Writer - Blogger - Co founder at TEDxSmouha
.. عُمر الأسكندراني .. بدرس هندسة في جامعة الاسكندرية .. 23 سنة .. مُحب للتاريخ و علوم النفس و الاجتماع .. مُحب للرياضة و غير مُحب للرياضيات .. عَلماني ليبرالي يساري يميني اسلامي مُتشدد ..و من الناس اللي بتحب تفكر في الدين و بتتفكر في تطبيقه بيحب سورية و أهل سورية و أي حاجة من ريحة سورية متناقض جدا .. هادئ جدا .. عملي جدا جدا جدا