فيديو عن رمضان بطعم زمان

رمضان جانا وفرحناله بعد غيابه أهلاً رمضان
ساعات قليلة وحنستقبل شهر رمضان الكريم، أكيد كلنا شوفنا الفوانيس وبهجتها اللي مليا الشوارع وشوفنا الزينة اللي ناس كتير بدأوا يعلقوها في الشوارع، وطبعاً بما أن خلاص رمضان قرب يبقى لازم الياميش يشرف في كل بيت مصري.

رمضان لما بيهل علينا بنحس قد اية ربنا كرمنا بتلاتين يوم خير وبهجة وكرم وسعادة، بنحس بالشوق واللهفة ليهم من قبليها وكتير مننا بيستعد ويجدد النية والتوبة وانو يرجع لربه سبحانه وتعالى.

رمضان فيه حاجات كتيرة اوي بتربطنا بيه، ويمكن جيل ورا جيل بنختلف في ايه هي الحاجات اللي بتربطنا برمضان
بس الأكيد أن فيه حاجات ثابتة منقدرش نستغنى عنها زي أغنية رمضان جانا اللي تعتبر علامة مميزة عند كل مصري وطبعا فانوس رمضان بألوانه المبهجة والمشروبات الرمضانية المميزة ولمة العيلة الجميلة والعبادة والصوم وصلاة التراويح اللي مليانة بركة وموائد الرحمن اللي بتطعم كتير من الناس المحتاجين وحاجات كتير اوي بتربطنا بيه.

رمضان بيفكرنا ببكار وفطوطة وبوجي وطمطم والفوازير ومسلم ومسيحي بيفطروا مع بعض على مدفع أذان المغرب وبالحبايب والاقاريب اللي بنشوفهم في لمة رمضان.

يمكن تكون فيه حاجات كتير اتغيرت دلوقتي على مجتمعنا يس مفيش حد يقدر ينكر بهجة رمضان وفرحتنا بقدموه كل سنة وزينة وفانوس رمضان وبهجتهم والمسحراتي اللي بيعدي من تحت بيتنا.

أكيد كلنا بنشتاق لايام وليالي رمضان عشان كدة كل حد لسة بيغلط وبيعمل ذنوب حنقوله جدد نيتك وارجع لربنا من تاني في شهر الغفران والرحمة، كل حد مش قريب من أهله وبعيد عنهم حنقولوا عندك فرصة تتجمع من تاني مع عيلتك وتاكلوا سوا مع بعض، كل واحد عنده يأس وإحباط حنقوله ادعي ربك وقرب منه ودعواتك أكيد حستجيب ليها وحيقف معاك ما هو وحده المستجيب لدعا عباده، كل واحد مفارق وبعيد ومخاصم أحبابه أو أقاريبه أو صحابه حنقوله سامح واغفر وابدأ بالصلح ونقي قلبك في شهر الخير والتسامح وصلة الرحم والود.

حاولوا ترجعوا كل حاجة تفرحكم وتسعدكم في أيامكم وخلو الشهر الكريم ده بداية أنك تصلح كل اللي فسدته الأيام اللي فاتت وبداية لتجديد النية و تطوير ذاتك خلي الشهر ده بداية للتسامح ووصل الود باللي حواليك بداية أنك تتغير للأحسن.

رمضان خلاص على الابواب
استعدوا ليه بتجديد نواياكم
حقيقي والله اشتقنالك يا رمضان.

معلومات عن الكاتب