Mind Mapping strategies

Mind Mapping strategies

محتاج حاجة تنظملك حياتك و تفكرك دايما بالحاجات اللي بتحبها و الاشخاص اللي قريبين منك
محتاج حاجة ترتب بيها أولوياتك و تكون معروضة قدامك معظم الوقت بشكل كويس يخليك تحس انك بتتقدم او بتنجز في حياتك يعني ..
انصحك بالـ
MIND MAPPING

لو كنت زي حالاتي من النوع اللي بينسي و بيفكر اكتر من اللازم و بيكون مشوش معظم الوقت و كل حاجة بتدخل في بعضها ..
ولو مش عايز اليوم او الاسبوع او الشهر او نص السنة او السنة تضيع علي الفاضي او تستغل وقتك الاستغلال الامثل ..
ولو بتخطط لحاجات و فجأة تفاصيلها تقع منك و تلاقي نفسك متلخبط و مش عارف كنت فين و بقيت فين .. و كأنك محتاج حد ماشي وراك يقولك انت عليك ايه و خلصت و مخلصتش ايه ..

الخرائط الذهنية بتحل جزء كبير من المشكلة دي خصوصا لو ربطها بخريطة زمنية تحددلك فترات زمنية معينة تعمل في حاجات معينة او تحقق حاجات معينة او تنفذ حاجات معينة ..
غالبا الفترات الزمنية بتتعمل اما كل سنة او كل نص سنة او كل 33 شهور او كل شهر .. و يوم ما بتقل عن شهر بتكون مجرد ملاحظات او قايمة بالحاجات اللي هتعملها في 15 يوم مثلا .. انا عن نفسي بعملها كل سنة و بحاول اخلي فيها تفاصيل علي قد ما تقدر ..

** المبدأ الاساسي في الموضوع ـ خصوصا لو بتعاني من مشاكل التفكير الزايد ـ هو انك بتاخد الحاجات الملخبطة اللي في دماغك و تنقلها علي خريطة بشكل منظم و مُرتب عشان تبسط علي دماغك و تهون علي نفسك .. و بمجرد ما تنقل الحاجات دي من دماغك علي الخريطة بتحس براحة جوا عقلك و هو انك حبست الافكار اللي كانت بتجري ورا بعضها علي ورق و قيدتها بخطة و بزمن معين يخليها قيد التنفيذ مش بس مجرد افكار .. **

اول حاجة : المحتوي

ايه اللي بيكون جوه الخريطة دي ؟
اشخاص قريبين منك او يهمك امرهم او مسؤولين منك
حاجات مينفعش تعدي السنة غير لما تعملها
حاجات بتحبها
احلام نفسك تعملها طول حياتك و بتسعي لتحقيقها
حِكم او امثال او مقولات بتؤمن بيها و بتشجعك و تحفزك
صور ناس بتحبهم و عايزهم دايما قدامك
جزء من معتقدك الديني و تطبيقك ليه سواء مسلم او مسيحي و عن نفسي مثلا ..
اقرب ايات قرآانية لقلبي بكتبها و كأنها رسايل في اوقات مختلفة
ورد او سور تقراها او تحفظها كل فترة بحيث انك تبقي قريب دايما من القرآن
كتب معينة ميعديش السنة غير و انت بتقراها و دي بشكل عام كتب دينية او كتب تانية
ممكن تكتب قوانين معينة في حياتك حابب تلتزم بيها و مش عايز تكسرها .. و محتاج تفكر نفسك بيها دايما
احداث مهمة بتحصل في حياتك و عايز تخلدها و تفرح او تتعظ بيها كل ما تعدي عينك عليها
اشخاص جديدة دخلوا حياتك تحت اي مسمي .. و اشخاص تانية خرجوا منه او اتخلوا عنك
و هكذا .. ممكن تضيف فيها اي حاجة انت مهتم بيها و مهتم بمتابعتها بشكل يومي و مش عايزها تغيب عن عينيك

تاني حاجة : التصميم

ازاي تصمم خريطة ذهنية ؟
دي حاجة ترجعلك في المقام الاول .. كل واحد بيصمم الخريطة علي حسب طريقة تفكيره و علي حسب رؤيته و علي حسب سهولة وصوله و سهولة التعامل مع الخريطة .. انا عن نفسي بفضل الدواير و بحسها منطقية و بلوّنها و بوّصل بينها بخطوط ملونة .. انت ممكن تعملها خطوط او تعملها بشكل رقمي .. كل تصميم علي حسب أولوياتك بس بشكل عام .. حافظ علي 4 حاجات في التصميم ..
انك تعكس كل معتقاداتك و قناعاتك و فِكرك و الروحانيات اللي بتمثلك الوصل بينك و بين ربنا
انك ترتب اهم و اكبر الافكار و الاهتمامات و الأولويات و الحاجات اللي لازم تعملها و الحاجات اللي بتحبها و الحاجات اللي نفسك تعملها قبل ما تموت ..
انك تكتب الاشخاص اللي موجودة بحياتك .. مش مشكلة بترتيب معين اهم حاجة انك تدخلهم جوا الخريطة و ناس بتحبها .. ناس بتكرهها .. ناس ليهم فضل عليك .. ناس مسؤولين منك و لازم تراعيهم و هكذا
بتسيب اماكن لــ

  • checklist
  • TO DO list
  • Wish list
  • places list

اخر حاجة هيا الألوان .. مهم اوي ان التصميم يكون بيفرق بين الحاجات عشان عينيك تكون مرتاحة و متحسش ان اللخبطة اللي كانت في دماغك زادت .. و اختار الوان مريحة للحاجات اللي بتحبها و الوان مش بتحبها للحاجات اللي عليك او لازم تخلص منها او حاجات مضايقاك

تالت حاجة : تشغيل الخريطة

الموضوع سهل بس محتاج نظام و تعود .. كل اسبوع و غالبا كل جمعة بتقف قدام الخريطة تعملها تحديث و تراجع انت كنت فين و بقيت فين و عملت ايه جديد و خلصت من ايه و حققت ايه و بقي عليك ايه جديد و هكذا ..
الالوان اللي بتستخدمها بتساعد انك تستخدم الخريطة احسن و احسن .. اهتم بالالوان
متكتبش كل حاجة بالتفصيل اكتب عناوين بس و سيب عقلك يفتكر التفاصيل عشان تمرن الدماغ علي عملية التخزين و الاسترجاع بسهولة ..
استخدم ورق اضافي ملون تلزقه علي الخريطة يتشال و يتحط للحاجات الطارئة اللي مكنتش عامل حسابك عليها او عايز تضيفها للخريطة بشكل مختلف ..

** اخيرا : شوية حاجات كده تخلي بالك منها ..

الخريطة تعتبر من درجات الخصوصية العالية .. متعرضهاش للناس و متخليش حد يتطلع عليها مهما كانت درجة قُربه منك .. خليها سرية بمحتوياتها .. ممكن الناس تعرف انك بتستخدمها بس اوعي تقول لحد علي اللي جواها او تتناقش مع حد علي تفاصيل فيها ..
خللي مكان الخريطة دايما واضح و متشاف ليك يعني بلاش ورا باب اوضتك .. لازم تكون متشافة كويس وواضحة ليك طول ما انت موجود في الاوضة ..
الخريطة محتاجة نظام .. و محتاجة التزام و لو معندكش حاجة من دول متعملهاش لانك كل ما تعدي عليها هتحس انك مضايق انك مش ملتزم بحاجة و هتبقي عبء عليك ..

انصح الشباب الصغير انه يبدأ يستخدمها و خصوصا من قبل الثانوية العامة .. انا بستخدم الخريطة الذهنية من 4 سنين و حاسس اني لو كنت بستخدمها بدري عن كده كانت هتفرق معايا في حياتي .. لانها ساعدت بشكل كبير انها تخفف عليا الضغط النفسي و ترتب دماغي .. فـ لو انت اب او انتي ام او تنصح حد اصغر منك .. ساعده انه يعمل خريطة زهنية لحياته حتي لو شهرية مش لازم سنوية .. ده هيحول حياته من الفوضي و اللاشئ الي الفِهم و النظام و المسؤولية .. حتي لو كانت مسؤولياته انه يروي زرعة او يقرا كتاب واحد .. و عموما احساس جميل انك تحس ان دماغك مفروشة قدامك و بتعرف توصل و تفتكر الحاجات المهمة في حياتك و تحقق اقصي استفادة من الوقت .. و بالنسبة للناس اللي حياتها روتينية و محبوسة جوا اطار حياتي معين .. نصيحة بلاش تجربوها .. اما هتبوظ الروتين او هتبوظ الخريطة و في الحالتين نفسيتك مش هتبقي تمام .. ولو حد اتضطر يعملها .. ميعملهاش باطار زمني

ممكن تدمج فكرة التحديات في الخريطة و ده شئ عظيم جدا .. مثلا انك تقول انا هتحدي نفسي انزل اجري علي البحر الشهر ده 5 كيلو او اني افضل 15 يوم بدون مشروبات غازية .. او انك تقرا صفحة واحدة من كتاب كل يوم لمدة شهر مثلا و هكذا ..
اوعي اوعي اوعي كلام الناس السلبي عن طريقة الخرايط دي يحبطك .. هتسمع كلام تريقة كتير و هتسمع احباط و استسهال في كل حاجة .. خليك زي ما انت .. الناس دي نفسها تقلدك بس مش عارفة .. التزم بالخريطة و اعتبرها عهد ووعد بينك و بين نفسك و لو خالفت الوعد ده متستحقش تقف قدام المراية تاني و تواجه نفسك انك تقدر تلتزم بكلمتك لنفسك

دي مش خريطة للمواعيد او نتيجة مثلا تحط فيها المشاوير المهمة .. دي حاجة ودي حاجة ..

حاول تضيف ابعاد جمالية و فنية لحياتك انك تختار رياضة مثلا او فن معين و يبقي ده من ضمن اهتماماتك و تتابع نفسك فيه بشكل مستمر .. كأنه التحلية اللي بتبقي بعد اكلة تقيلة

اخر حاجة .. واهم حاجة و هقولها تاني .. محدش يشوف الخريطة دي من قريب و يقرا اللي انت كاتبه فيها .. استعينوا علي قضاء حوائجكم بالكِتمان ..

** من الحاجات اللي هبقي سعيد بيها اني لو ساهمت بانتاج خرائط ذهنية علي شكل تطبيق علي الموبايل مثلا او حتي طباعة الخريطة الذهنية دي بالالوان للتسهيل علي الناس .. هكون سعيد جدا و تكونوا ساهمتوا اني احقق امنية من امنيات الخريطة الزمنية بتاعتي ..
و ده خلاصة اربع سنين من استخدام الخرائط الزمنية ..
دعواتكم بقي 

اسف .. ال خريطة دي معمولة من سنة و انتهت النهاردة بالنسبالي .. انا مش موضح اي كلام مفصل فيها .. حاولت اسيب شكلها بس .. ابدأ في خريطتك بنفسك

معلومات عن الكاتب
Student - Former Account Manager - Former Public Relations Adviser - Creative Writer - Blogger - Co founder at TEDxSmouha
.. عُمر الأسكندراني .. بدرس هندسة في جامعة الاسكندرية .. 23 سنة .. مُحب للتاريخ و علوم النفس و الاجتماع .. مُحب للرياضة و غير مُحب للرياضيات .. عَلماني ليبرالي يساري يميني اسلامي مُتشدد ..و من الناس اللي بتحب تفكر في الدين و بتتفكر في تطبيقه بيحب سورية و أهل سورية و أي حاجة من ريحة سورية متناقض جدا .. هادئ جدا .. عملي جدا جدا جدا