التعويذة - الجزء الثاني

التعويذة - الجزء الثاني

 

لو متخيل ان الفهم سهل ؟

و لو متخيل ان المعرفة مقتصرة بس علي العلوم الطبيعية مش العلوم الدنيوية كمان .. انصحك متكملش قراية

التعويذة الأسهل اللي هنبدأ بيها هيا الاجابة عن السؤال الأول ..

أبدأ منين ؟

غالبا لو دورت علي كل فرد ناجح في التاريخ هتلاقي نجاحه معتمد علي 3 اركان رئيسية ..

شخصية قوية – علم و معرفة – إيمان داخلي

الشخصية القوية مش معناها السيطرة او القيادة .. الشخصية القوية هي الشخصية اللي مرت بتحديات كتيرة وواجهتها كلها .. مستسلمتش للظروف و مسلمتش للواقع .. الشخصية قوية بكونها بتقوم بعد كل وقعة و ترجع اقوي من الأول .. الشخصية القوية بتفرض نفسها بين الناس بالاحترام و الثقة مش بالقوة و الصوت العالي .. و الشخصية بالمناسبة عامل مُكتسب .. محدش بيتولد شخصيته قوية او ضعيفة .. الظروف و المناخ المحيط و التربية و النشأة و التعوّد هما عناصر تكوين الشخصية .. و الشخصية غير الطِباع .. بمعني ان الطباع صعب تتغير انما الشخصية ممكن تتغير لو فيه دافع قوي ورا التغيير ده ..

 

وبما ان العوامل اللي بتكون الشخصية مُتغيرة .. يبقي الشخصيات كمان متغيرة .. و اختلاف الشخصيات ده من سُنن الحياة عشان اختلاف الشخصيات بيمثل اختلاف الاهتمامات و الحاجات اللي بنحبها و الحاجات اللي بنكرهها .. كمان اختلاف الشخصيات ميزة في اختلاف المهن و الوظائف .. غالبا الشخصيات المختلفة بتنجذب لبعضها عشان كده الشخصيات المختلفة كمان بتساهم في معايير اختيار شريك الحياة و هكذا .. الشاهد في الموضوع ان الشخصية شئ مميز جدا للانسان .. إما يميزه بالايجاب او بالسلب و ده معتمد عليك ..

 

عايز تحسن من شخصيتك ؟ يبقي انصحك بالتعامل مع اكبر عدد ممكن من الناس .. اختار الصعب دايما و اتحدي نفسك و اللي حواليك .. اتجنب الصفات اللي بيرفضها الناس زي الغضب و الكِبر و الغرور و الكذب الخ .. و حاول تتمرن علي الهدوء و التواضع و المؤاثرة و الصدق .. قدّم عقلك علي عواطفك .. خد وقت في التفكير في كل حاجة .. متقارنش نفسك بحد و متفكرش في حد غير نفسك و متتكلمش علي حد ولا تغتاب حد .. كل الحاجات دي بتشغل حيز من تفكيرك و بتخليك مشتت ..

 

الجهل هو الأصل .. و المعرفة هيا الاستثناء .. بمعني انك بتتولد مش عارف اي حاجة و بتتعلم مع والوقت .. في مثل صيني بيقول فيما معناه ان اليوم اللي متعلمتش فيه حاجة جديدة مهما كنت شايفها بسيطة و تافهة يبقي يوم ضايع من حياتك .. و بما ان الجهل الأصل يبقي المعرفة و الثقافة هيا اللي هتخليك استثناء و هتميزك عن غيرك و هتخليك محل ثقة و احترام .. و طبعا مش محتاج أقولك ان الجهل نفسه مش عيب .. المشكلة في تفضيل الجهل علي انك تتعلم او تتدعي انك عارف لمجرد انك مكسوف تقول مش عارف و ده طبعا هيخليك دايما في خانة " الفتيّ" ..

 

ابدأ بمعرفة الحاجات اللي بتحبها .. اكتب قايمة بالحاجات اللي عايز تقرا عنها او تفهمها .. جمّع كتب .. استخدم اليوتيوب .. اسأل اللي عارف .. مش عيب .. تداول العلم و المعرفة و الثقافة سمة من سمات المجتمعات المتحضرة .. وكان زمان بيتعمل صالونات ثقافية بين الأدباء و العلماء و الكُتاب و السياسيين يناقشوا فيها أفكارهم و يتشاركوا المعلومات و خبرات السفر و هكذا .. حتي لو حوّلت أقعدت القهوة لقعدة ثقافية فيها حوارات مثمرة و بناءة و مفيدة في أي موضوع هيولّد وجهات نظر جديدة و طرح أفكار ..

 

و بالاضافة لأهم عامل في انك تتعلم .. انك تصاحب اللي عايزين يفهموا و يتعلموا و بيشاركوك نفس الطموح و الرغبة في فهم الحاجات اللي حواليهم .. اتقالت قدام كلمة " فاشية " اسأل يعني ايه .. سمعت عن " دولة الصلاجقة " روّح اقرا عن الدولة دي و اعرف كانت فين و امتي و ايه دورها في التاريخ .. بتسمع عن " المورفين " كتير بس متعرفش ده ايه و بيعمل ايه .. اسأل .. متبقاش مجرد مستمع و متسيبش الكلام يعدي عليك كأنه متقالش .. افتكر دايما ان هييجي اليوم اللي ابنك هيسألك فيه يعني ايه ثقب اسود و يعني ايه الزمكان و يعني ايه كلمة " تعويم الجنيه " .. و مينفعش تقوله معرفش او تفتي و انت مثل أعلي ليه ..

 

الجانب الايماني هو جانب روحي بحت .. بيغذي الجانبين الشخصية و المعرفة .. يُعتبر هو الدافع ورا الشخصيات المُجتهدة و الرغبة في التعلم .. ممكن يكون وازع ديني و ممكن يكون دافع مصدره فكرة معينة او انتماء لقومية معينة او دافع الانجاز للانجاز نفسه .. كونك مسلم او مسيحي فربنا أمرك بالاجتهاد في العلم و امرك بالسعي ورا الحقيقة .. متصدقش ابدا اي حد يتهم دينك بالجمود .. الدين دافع حيوي ربنا كرّم بيه الناس عشان يكون دستور لحياتهم و يخلي تفكيرهم مُنظم مبني علي الأوليات .. و العلم أولوية من أولويات الدين ..

 

التعويذة الأولي 3 محاور .. شخصية و معرفة تُعلي من قدر الشخصية و ايمان يُحرك الشخصية و المعرفة .. و بكده يكتمل أول مثلث .. كمّل المثلث ده و صدقني حياتك هتتغير .. اعرف رأي الناس في شخصيتك .. اتعلم كل يوم حاجة جديدة عن أي حاجة .. ثقف نفسك دينيا أو اعتنق فكرة معينة تكون وقود ليك .. ممكن يكون حبك لشخص معين أو حبك للحيلة بشكل عام دافع .. المهم اهتم بأنك تكون الاستثناء وسط الجهل اللي بيزيد يوم عن يوم .. صدق اللي قال العلم نور ..

 

قيمتك كإنسان بتبدأ من تقدير الناس لشخصك .. و تأثيرك في الحياة معتمد علي علمك و معرفتك .. و بدون ايمان مطلق .. عمرك ما هتوصل لحاجة ..

التعويذة دي مش سر .. شاركها الناس كلها .. اعتبر ان ده علم ممكن يُستفاد بيه و تبقي ساهمت بنشره و ساعدتيني في رسالتي ..

معلومات عن الكاتب
Student - Former Account Manager - Former Public Relations Adviser - Creative Writer - Blogger - Co founder at TEDxSmouha
.. عُمر الأسكندراني .. بدرس هندسة في جامعة الاسكندرية .. 23 سنة .. مُحب للتاريخ و علوم النفس و الاجتماع .. مُحب للرياضة و غير مُحب للرياضيات .. عَلماني ليبرالي يساري يميني اسلامي مُتشدد ..و من الناس اللي بتحب تفكر في الدين و بتتفكر في تطبيقه بيحب سورية و أهل سورية و أي حاجة من ريحة سورية متناقض جدا .. هادئ جدا .. عملي جدا جدا جدا