أنا مواليد شهر 13 يبقي أنا برج إيه؟

التقويم الغريغوري

هي من أولها غريغوري! التقويم الميلادي (اللي هو الغريغوري) زي ما إحنا نعرفه هو بيعبّر عن السنة الشمسيّة، وهو مقدار الزمن اللّي بياخده كوكب الأرض علشان يلف لفّة كاملة حول الشمس. وهو مش 365 يوم ولا حتى 356 وربع، لكن هو تقريبا 365.24 وعلشان كده مش شرط إنّ كل 4 سنين تكون سنة كبيسة بس مش هندخل في حسابات معقّدة.

كفاية نعرف ان السنة هي عبارة عن 12 شهر وخلاص وبتبدأ بيناير وتنتهي بديسمبر، وأسماء الشهور ديه هي خليط من أسماء آلهة على أسماء أشخاص على أرقام.

النجوم

"وبالنجم هم يهتدون" -سورة النجم-

لو أنت واحد فاضي هتفضل تعد النجوم، وكمان ممكن تسمّيها بس انت لو كنت عايز زمان فالنجوم هي " GPS- google maps " للناس زمان وعلشان كده كانت مهمة جدا ليهم. ولأن طبعًا كل النجوم شبه بعض، فممكن ناخد حبة كده ونخليهم مجموعة بحيث نتعرف عليهم بسهولة أكتر. فالمجموعة الواحدة اسمها كوكبة و ملهاش علاقة بالكوكب، وهتلاقي مثلا كوكبة زي (كوكبة الكلب)، (كوكبة الجبار)، (كوكبة العواء) إلخ.. لغاية 88 كوكبة.

ديه معلومة ممكن تبقى صادمة بس.. الكواكب بتدور حول الشمس، وتقريبا كده مش 3d يعني بتدور بشكل مسطح. وده اللي بيسموه دائرة البروج، ومن الـ88 كوكبة دول فيه منهم 13 واحدة عند دائرة البروج. أيوه يعني فيه 13 برج والبرج الناقص ده اسمه حواء، بس السنة 12 شهر فمش مهم واحد.

الأبراج

الأبراج اللي نعرفها حاليًا هى كوليكشن كده من إعتقادات إغريقية على فرعونية وهكذا، والمنجمون بيستخدموا أي شيء علشان يوهموا الناس انّهم عندهم علم، زي انّهم يقرأوا خطوط اليد، أو أوراق الشاي، أو حتى النجوم، بيستغلوا جهل بعض الناس في الترويج للخرافات.

والناس كمان بتساعدهم في انّهم يعملوا ده، لما بيكونوا عايزين يعلقوا فشلهم على ظروف خارجية أو حتى منتظرين أخبار سعيدة من غير ما يشتغلوا علشان يحصلوها. وفيه مشاكل بتحصل زي إن النساء يعملوا إجهاض لاعتقادهم بإن السنة ديه أو الشهر ده سيء.

الأبراج زيه زي أي فرع من فروع التنجيم اللي بتدعي إنها قادرة على معرفة المستقبل، وبيحاولوا يصيغوا الموضوع بصيغة علمية ويقولك فيه علم ومعادلات... إلخ  وكل ده بيندرج تحت مُسمى (العلم الزائف).

علماء الأبراج

وبعتذر طبعًا عن لفظ "علماء"، لا يفقهوا أي شيء في علم الفلك أصلًا، محدش منهم يعرف مثلًا برج الدلو ده فيه كام نجم، ولّا إيه هي أسماء النجوم ديه. بالإضافة إن أصلًا مواعيد البروج ديه بيتغير مش ثابت زي ما هما بيقولوا.

ليس هناك طريقة لمعرفة المستقبل، العلماء الحقيقيون بيستخدموا الفيزياء والكيمياء والرياضيات علشان يعملوا تنبؤات .. للأسف احنا كمان علينا دور وهو اننا بننشر الخرافات ديه حتى لو من باب الهزار.

عدد الأبراج 12 وعدد شهور السنة برضو 12 عايز إثبات أكتر من كده إيه على إن الأبراج حقيقية -كارل ساجان- 

برغم إن عالم الفيزياء الشهير (كارل ساجان) بيتمتع بحس الفكاهة إلّا إن الموضوع ده فعلا بيضايقه، بيقول إن مفيش جريدة في أمريكا -وللأسف عندنا برضو في الوطن العربي- لا تخلو من عمود ثابت لخرافة الأبراج ومعندهمش على الأقل عمود ولو أسبوعي علمي.

للأسف بشوف ناس كتير مهتمة بالموضوع ده ولما باجي أكلمهم بيقولوا لي إحنا عارفين إنها خرافات إحنا بس بنهزر، بس للأسف ده مبيكونش واضح. وكمان بيساعد على إنه ينتشر بين الناس اللي مش فاهمة الموضوع كويس، وتقريبا مش هتلاقي برنامج مش بيستضيف الأشخاص بتوع الأبراج وبيعاملهم على إنهم فعلا علماء وعلى إن كلامهم ده صحيح من أول برامج الأخبار والبرامج الحوارية وحتى البرامج الترفيهية.

وبيتم استغلالها في محاولة خداع للشعب لتبرير إن الظروف دلوقتي حاليًا وحشة بس ده مش بإيدنا، بس السنة الجاية هتبقى أحسن. ولما تيجي السنة الجاية يقولوا نفس الكلام، واستنوا السنة الجاية هتبقى أحسن علشان الناس تفضل عايشة في الوهم.

ممكن تجرب بنفسك وتشوف التسجيلات القديمة للبرامج ديه، وشوفهم كانوا بيقولوا إيه على أساس طبعًا إن الناس بتنسى.. 

أنت إيه رأيك في الموضوع ده؟

معلومات عن الكاتب
طالب بكلية الهندسة
مؤلف روايات خيال علمي مثل: أربعة إلى واحد - سلسلة المعادلة مهتم بـ (تبسيط العلوم) زي اللي بيعمله "الدحيح" وشاركت في معارض علوم زي معرض مكتبة الاسكندرية، وكنت من المتحدثين في TEDx بكتب في المواضيع الاجتماعية والمنطق، والمناقشات